Formimi akademik, si formal ashtu edhe joformal, është thelbësor për nxitjen e qytetarisë aktive dhe cilësinë e pjesëmarrjes në proceset demokratike. Formimi i gjithanshëm akademik shërben në përgatitjen e studentëve për të ndikuar në politikbërje, përmes përfshirjes së mëvonshme në administratën publike, organizatat e shoqërisë civile, apo institutet kërkimore. Ndaj, është thelbësor angazhimi i shoqërisë civile në ndërtimin e marrëdhënieve reciproke të dobishme mes universiteteve dhe komunitetit më të gjerë.
Përfshirja e studentëve dhe e të rinjve në proceset e planifikimit të politikave mbetet mjaft e kufizuar dhe është nevoja për të shfrytëzuar potencialin e studentëve për të qenë burime të politikave novatore. Për të arritur këtë synim, studentët duhet të ekspozohen ndaj informacionit cilësor mbi sfidat e ndryshme të politikave publike dhe të konsolidojnë kapacitetet e tyre për të kontribuar në mënyrë efektive.
Në këtë kontekst dhe me synimin për të nxitur mësimin/kërkimin ndërdisiplinor dhe bashkëpunimin mes universiteteve, shoqërisë civile dhe tregut më të gjerë të punës, IDM mbështeti hartimin e gjashtë artikujve nga studentë të Fakultetit të Shkencave Sociale dhe Fakultetit të Drejtësisë, nën udhëheqjen e një grupi ekspertësh, mbi çështjet më aktuale të politikave publike si anti-korrupsioni, integrimi në BE, çështjet e sigurisë kibernetike, parandalimi i ekstremizmit të dhunshëm dhe reforma në administratën publike.
Shfletoni më poshtë secilin prej artikujve: