Shtyhet afati për aplikim për ekspertë të interesuar në hartimin e dokumenteve të politikave në kuadër të projektit “BAT Civil Society – Kapacitete për Mbikëqyrje Civile të Llogaridhënies dhe Transparencës Buxhetore”.
IDM mirëpret aplikime nga ekspertë për hartimin e një serie dokumentesh të politikave në kuadër të #BATproject, i mbështetur nga Bashkimi Evropian.
Instituti për Demokraci dhe Ndërmjetësim, në partneritet me Qendrën për Hulumtim dhe Politikëbërje dhe Faktoje, po zbaton projektin “BAT Civil Society – Kapacitete për Mbikëqyrje Civile të Llogaridhënies dhe Transparencës Buxhetore”, i financuar nga Bashkimi Evropian.
Ky projekt ka si qëllim përmirësimin e qeverisjes dhe mbikëqyrjes së transparencës dhe llogaridhënies buxhetore. Ai synon gjithashtu të avancojë politikat dhe praktikat aktuale të institucioneve shtetërore në nivel qendror dhe lokal, duke i fuqizuar ato në planifikimin, zbatimin dhe raportimin e buxhetit përmes një mbikëqyrjeje më të zgjeruar nga publiku.
Një ndër komponentët e #BATproject ka për qëllim hartimin e alternativave dhe instrumenteve të politikave që nxisin një ndikim të qëndrueshëm, duke përmirësuar jo vetëm kuadrin ligjor, por edhe qasjen dhe praktikat e punës së institucioneve të targetuara.
Në këtë kuadër, thirrja synon rekrutimin e një grupi ekspertësh për hartimin e disa dokumentesh politikash që përmirësojnë llogaridhënien buxhetore, transparencën, pjesëmarrjen, integritetin dhe çështje ndërsektoriale të ndërlidhura (si buxhetimi gjinor) në nivel lokal dhe qendror, si dhe për forcimin e roleve të organeve mbikëqyrëse dhe palëve të interesuara qytetare.
KUSHTET E ANGAZHIMIT
Ekspertët e angazhuar do të kenë për detyrë:
- Të marrin pjesë në takime përgatitore me ekipin e projektit për të diskutuar qasjen e punës, për të qartësuar pritshmëritë, për të ofruar udhëzime dhe për të rënë dakord mbi afatet.
- Bazuar në marrëveshjen me ekipin e projektit, të hartojnë një dokument politikash mbi temën e përcaktuar, duke ndjekur modelin dhe udhëzimet e ofruara, dhe ta dorëzojnë për shqyrtim ekipit të projektit.
- Të finalizojnë dokumentin e politikave dhe ta dorëzojnë në formë të gatshme për publikim.
- Të marrin pjesë dhe të prezantojnë dokumentin e politikave në punëtoritë e organizuara nga IDM.
PROCEDURA E APLIKIMIT
Personat e interesuar duhet të dorëzojnë aplikimet e tyre në adresën email [email protected] brenda datës 25 shkurt 2025, duke specifikuar në temën e email-it: “Aplikim për ekspert për BAT Project”.
DOKUMENTET E KËRKUARA
- CV (biografi e detajuar) që përshkruan përvojën relevante në përputhje me kualifikimet e përcaktuara në Termat e Referencës (ToR).
- Dy referenca nga punime të mëparshme (p.sh. punime akademike, raporte kërkimore, dokumente politikash, etj.).
PAGESA
Pagesa për këtë pozicion është EUR 2,700/ekspert (bruto). Pagesa do të kryhet në tre këste sipas parashikimeve të përfshira në kontratën e shërbimit.
SHËNIM: Për çdo pyetje ose sqarim lidhur me këtë thirrje, të interesuarit mund të dërgojnë pyetjet e tyre në të njëjtën adresë email-i, deri më 5 shkurt 2025.
Për më shumë detaje, ju lutemi gjeni Termat e Referencës (ToR).
