Përfshirja e punonjësve të policisë në aktivitete kriminale ndikohet nga ndërveprimi kompleks i kulturës institucionale, praktikave të rekrutimit dhe ndikimeve social-politike.

Në këtë kontekst, zhvilluam takimin me dyer të mbyllura për të prezantuar gjetjet e një studimi për përdorim të brendshëm të Policisë së Shtetit mbi vlerësimin e cenueshmërive institucionale dhe mekanizmave të qëndrueshmërisë në radhët e policisë në Shqipëri.

Ky studim përbën një vlerësim gjithëpërfshirës të kuadrit institucional dhe rregullator gjatë fazës së rekrutimit, shërbimit dhe pas lirimit nga detyra, duke synuar të zbulojë , parandalojë, dhe zbusë faktorët që çojnë drejt devijimit të sjelljes në këto institucione.

Në takim morën pjesë strukturat përkatëse të Policisë së Shtetit, përfaqësuesit e Qendrës Hedayah, Bashkimit Evropian, Qendrës së Koordinimit kundër Ekstremizmit të Dhunshëm, si dhe Sindikatës së Policisë.

Ky studim u krye në kuadër të projektit “Vlerësimi i cenueshmërisë institucionale dhe mekanizmave të qëndrueshmërisë në radhët e ushtrisë dhe policisë në Shqipëri” financuar nga Bashkimi Evropian dhe Hedayah – Qendra e Ekselencës për Luftimin e Ekstremizmit dhe Ekstremizmit të Dhunshëm.