Lista e projekteve

Titulli i Projektit: “Aleanca Civile 08: Së bashku drejt NATO-s”

Kohëzgjatja: 2007– 2008

Partnerë: FORUM Qendra për Kërkime Strategjike dhe Dokumentim në Shkup; Instituti i Marrëdhënieve Ndërkombëtare në Zagreb;

Zona: Shqipëri, Maqedoni, Kroaci

Donatorë: Sipërmarrës privatë e donatorë të ndryshëm

Që me fillimin e viteve 1990 vendet e Evropës Juglindore kanë parë të NATO jo thjeshtë një organizatë të sigurisë, por edhe si lajmëtare të një epoke të re të stabilitetit, zhvillimit të qëndrueshëm dhe prosperitetit demokratik në rajon. Në mbështetje të bashkëpunimit të Kartës së Adriatikut (A3) tri organizata jofitimprurëse, Instituti për Demokraci dhe Ndërmjetësim në Tiranë, FORUM Qendra për Kërkime Strategjike dhe Dokumentim në Shkup dhe Instituti i Marrëdhënieve Ndërkombëtare në Zagreb, kanë krijuar Aleancën Civile 08. Kjo nismë synon të hapë procesin e integrimit në NATO ndaj shoqërive dhe rajonit dhe të stimulojë sektorin jofitimprurës në vendet e A3 që të marrin përsipër përgjegjësi dhe të jenë partnerë aktivë të qeverive në integrimin euro-atlantik. Aleanca Civile 08 do të ofrojë një forum për nisma të përbashkëta lobuese në Bruksel dhe Uashington për anëtarësimin e Shqipërisë, Kroacisë dhe Maqedonisë në Samitin e vitit 2008. Aleanca Civile 08 gjeti mbështetjen dhe partneritetin e ministrave të mbrojtjes së vendeve të A3.

Aleanca Civile 08 mori jetë në tri konferenca kombëtare që u zhvilluan në Tiranë më 20.04.2007, Shkup më 23.04.2007 dhe Zagreb më 07.05.2007, kur përfaqësues të shoqërive civile, politikanë e qeveritarë diskutuan mbi procesin e integrimit të vendit në NATO, prioritetet kombëtare dhe kontributin që mund të japë shoqëria civile në në proceset evro-atlantike. Në këto konferenca u miratuan kuadri i veprimit të shoqërisë civile në secilin vend për të mbështetur dhe thelluar reformat.

Aktiviteti përurues i Aleancës Civile 08 i ishte konferenca kombëtare “Aleanca Civile 08: Së bashku drejt NATO-s” e organizuar nga Instituti për Demokraci dhe Ndërmjetësim (IDN) më 20.04.2007. Në të merrnin pjesë përfaqësues të organizatave joqeveritare, parlamentarë, anëtarë të qeverisë, politikanë, diplomatë të vendeve të NATO-s, akademikë, opinion-bërës e analistë të mediave, etj. Në seancën e hapjes përshëndetën kryetarët e dy grupeve parlamentare të PD dhe PS, përkatësisht Bamir Topi dhe Ben Blushi, ministri i punëve të jashtme, Besnik Mustafaj, ambasadorja e SHBA dhe pika dhe kontakti i NATO-s për Shqipërinë, Marcie B. Ries, zv/ministri i mbrojtjes Petrit Karabina, dy përfaqësuesit e organizatave partnere të IDN, përkatësisht Saso Ordanovski nga FORUM Qendra për Kërkime Strategjike dhe Dokumentim në Shkup dhe Damir Demonja nga Instituti i Marrëdhënieve Ndërkombëtare në Zagreb, si edhe komandanti i përfaqësisë ushtarake të NATO-s në Shqipëri Brig. Gen. Anastasios Rintis. Në fund të konferencës u diskutua dhe miratua “Kuadri për Veprim” i shoqërisë civile në Shqipëri (shih më poshtë).

Aktivitetet e tjera të Aleancës Civile 08 do të jenë veprimtari të shoqërisë civile në të tria vendet sipas “Kuadrit për Veprim”, lobime në Bruksel e Uashington si edhe një konferencë në Podgoricë për zgjerimin e bashkëpunimit rajonal të sigurisë së vendeve të A3 me vendet e tjera të rajonit të përfshira në programin e Partneritetit për Paqe -  Serbia, Bosnjë-Hercegovina, Mali i Zi - si edhe me Kosovën.

Drafti i Kuadrit për Veprim Civil: 2007-2008

Me shpresën e përmbushjes së aspiratës historikë për t’u integruar në NATO në samitin e ardhshëm në Uashington; me mbështetjen e plotë ndaj reformave strukturore të forcave tona të armatosura, organeve të zbatimit të ligjit dhe institucioneve të tjera; me besimin se shoqëria civile ka një rol të rëndësishëm për të luajtur në procesin e integrimit; ne si organizata të shoqërisë civile në Shqipëri, zotohemi të bashkojmë përpjekjet tona për të punuar së bashku në këta drejtime:

- Nxitja dhe mbështetja e një dialogu civil dhe të frytshëm midis qeverisë dhe opozitës për përmbushjen e reformave me interes vital për vendin dhe objektivin e integrimit në NATO;

- Bashkëpunimi i ngushtë me partitë politike për arritjen e mirëkuptimit për reformën elektorale;

- Monitorimi i zbatimit të reformave për fuqizimin e shtetit ligjor dhe thellimin e zbatimit të parimeve demokratike në vend;

- Ndërmarrja e nismave dhe e partneriteteve me agjencitë qeveritare për luftën kundër korrupsionit në sektorin publik;

- Mbështetja dhe pjesëmarrja në programe për ristrukturimin e sektorit të sigurisë, mbikëqyrjes civile dhe kontrollit demokratik të forcave të armatosura;

- Ndërmarrja e fushatave të vetëdijesimit publik mbi detyrat dhe përgjegjësitë e integrimit të vendit në NATO;

- Mbështetja dhe pjesëmarrja në bashkëpunimin rajonal dhe nisma të rritjes së mirëbesimit ndërkufitar;

- Pjesëmarrja në lobime në rrafshin kombëtar, rajonal dhe ndërkombëtar në Bruksel dhe Uashington për anëtarësimin e Shqipërisë në NATO, së bashku me Kroacinë dhe Maqedoninë.

Letter of Civil Alliance 08 to the ministers of Interior of Albania, Croatia and Macedonia for the endorsement of the Civil Alliance objectives

 

 Titulli i Projektit: “Ndërtimi i kapaciteteve për lobim të  të rinjve të Ballkanit”

Kohëzgjatja: Janar – Dhjetor 2006

Partnerë: Forumi për Marrëdhënie Etnike (FER), Beograd; Qendra për Kërkime dhe Politikë-bërje (CRPM), Shkup; Qendra për Monitorim, Podgoricë; dhe Rrjeti Rinor i Kosovës, (KYN) Prishtinë.

Zona: Shqipëri, Serbi, Mal i Zi, Kosovë dhe Maqedoni

Donator:  Rrjeti i Shoqërisë së Hapur (Soros)

Rrjeti Nisma Rinore Ballkanike që u themelua në  kuadër të projektit “Adresimi i Sfidave për të Ardhmen e Ndërtimit të Mirëkuptimit Rajonal”, vazhdoi punën për çimentimin e bashkëpunimit midis liderëve të rinj të rajonit. Ata ndërmorën zbatimin e një projekti për trajnimin e të rinjve për ndërtim kapaciteti e rrjeti, si edhe strategjitë e avokimit e  lobimit. Përveç kësaj ky projekt shërbeu dhe si një mundësi për vlerësimin e zhvillimeve në lidhjet të rinjtë në Shqipëri dhe në vendet e tjera të Ballkanit, edhe në kuadër të integrimit në BE. Veprimtaritë e realizuara në kuadër të këtij projekti ishin një tryezë e rrumbullakët në Tiranë, sesione të trajnimit në Durrës dhe një konferencë rinore në Shkup. Në këtë të fundit, organizatat pjesëmarrëse rinore miratuan plane për lobim rinor të përbashkët.

Kohëzgjatja: Prill 2005 – Mars 2006

Partnerë: Qendra Maqedonase për Bashkëpunim Ndërkombëtar (MCIC), Maqedoni; Qendra Kosovare për Zhvillim (KDC), Kosovë.

Zona: Kukës (Shqipëri), Prizren, Dragash (Kosovë) dhe Gostivar (Maqedoni)

Donator: ICCO (Holandë)

Një nga zonat ndërkufitare më pak të zhvilluara është edhe zona në trekëndëshin ku bashkohen kufijtë e Shqipërisë, Maqedonisë dhe Kosovës. IDN së bashku me dy organizata partnere nga Kosova dhe Maqedonia hartuan dhe zbatuan një projekt të përbashkët që kishte për qëllim rritjen e kapaciteteve të burimeve njerëzore të organeve të qeverisjes vendore si dhe të shoqërisë civile në këtë zonë. Ky projekt konsistoi në organizimin e disa trajnimeve mbi planifikim strategjik, etapat e zbatimit të projektit dhe mbi planifikim veprimi. Trajnimet u organizuan në Durrës, Strugë, Shkup dhe Mitrovicë.

Në fazën dytë të këtij projekti u organizuan tre tryeza pune, një në secilin vend, ku përfaqësues të grupeve të fokusuara hartuan projekt-planet e zhvillimit për çdo bashki apo komunë. Planet e zhvillimit u prezantuan në Konferencën përmbyllëse të organizuar në Prizren të Kosovës. Gjatë gjithë kohëzgjatjes së këtij projekti u botua edhe një revistë mujore disa-gjuhëshe e cila u shpërnda në tre zonat ku u zbatua ky projekt si dhe në institucionet qendrore të secilit vend. Rezultatet kryesore të këtij projekti janë punonjës dhe zyrtarë të njësive të qeverisjes vendore të këtyre zonave të trajnuar si dhe planet e zhvillimit për çdo zonë ku u zbatua ky projekt.

Plani Vendor i Zhvillimit të Bashkisë Kukës (Shqipëri)

Plani Vendor i Zhvillimit të Bashkisë Gostivar (Maqedoni)

Plani Vendor i Zhvillimit të Bashkive Prizren dhe Dragash (Kosovë)

 Titulli i Projektit:  “Shqipëria dhe Maqedonia drejt bashkëpunimit të qëndrueshëm për ndërtimin e besimit dypalësh dhe rajonal”

Kohëzgjatja: Prill 2004 – Mars, 2005

Partner: Instituti Euro-Ballkan, EBI, Shkup

Zona: Shqipëri,  Maqedoni

Donator: Freedom House/USAID

Ky projekt ishte një vazhdim i projektit: “Shqipëria dhe Maqedonia drejt  rritjes së mirëkuptimit dhe vlerësimit dypalësh”  i zbatuar nga IDN dhe EBI gjatë vitit 2002 dhe kishte për qëllim monitorimin dhe mbështetjen e proceseve dypalëshe për thellimin e mirëkuptimit mes Shqipërisë dhe Maqedonisë. Aktivitetet kryesore ishin organizimi i një pyetësori në të dy vendet, dy konferenca kombëtare në Shkup dhe Tiranë, si dhe dy konferenca të forumeve dypalëshe në Peshkopi-Dibër e Madhe (bashkëpunimi i medias) dhe Korçë (bashkëpunimi në fushat e kulturës dhe arsimit). Në fazën përfundimtare të projektit pjesëmarrës nga të vendet themeluan shoqatat e miqësisë mes dy vendeve të cilat do të institucionalizojnë përpjekjet e përbashkëta në fushat e kulturës, arsimit etj si dhe afrimin e mëtejshëm të dy vendeve tona. Shoqata e Miqësisë Shqipëri-Maqedoni drejtohet nga Akademiku Luan Omari kurse në Maqedoni nga Akademiku Gane Todorovski.

 Titulli i Projektit: “Adresimi i Sfidave për të Ardhmen e Ndërtimit të Mirëkuptimit Rajonal”

Kohëzgjatja: Mars 2004 – Prill 2005

Partnerë: Forumi për Marrëdhëniet Etnike (FER), Beograd; Aksioni Kosovar për Iniciativë Civile (KACI), Kosovë; Qendra për Tolerancë dhe Dialog (CEDEM), Podgoricë; dhe Instituti Euro-Ballkan (EBI), Shkup.

Zona: Shqipëri, Kosovë, Maqedoni,Mal i Zi, Serbi

Donator: Balkan Trust for Democracy dhe Fondacioni Soros i Kosovës

Aktivistë të rinj, drejtues dhe anëtarë të forumeve rinore të partive politike nga Serbia, Mali i Zi, Kosova Shqipëria dhe Maqedonia u bashkuan për krijimin e një rrjeti Ballkanik për Nisma Rinore me qëllim shkëmbimin e ideve mbi sfidat rajonale. Të rinjtë e përfshirë në këtë rrjet vijnë nga fusha të ndryshme si nga politika – drejtues dhe përfaqësues të forumeve rinore politike, deputetë, nga pushteti vendor, - si dhe studentë, opinionistë, përfaqësues të organizatave rinore, OJF-ve etj. Aktivitetet  kryesore ishin tri Tryeza të Rrumbullakëta – në Tiranë, Prishtinë dhe Cetinjë. Një nga aktivitete e rëndësishme në kuadër të këtij projekti ishte edhe takimi i grupit të të rinjve me Presidentin e Shqipërisë, zotin Alfred Moisiu. Në këtë takim Presidenti theksoi rëndësinë e bashkëpunimit si dhe ndërtimit të besimit reciprok mes gjeneratave të reja në rajon si dhe përgëzoi të rinjtë për këtë nismë të ndërmarrë.

Kohëzgjatja: Prill 2003 – Maj 2004

Partner: Instituti Euro-Ballkan, EBI, Shkup

Zona: Zonat kufitare mes Shqipërisë dhe Maqedonisë

Donator: Zyra e Marrëdhënieve Publike të Ambasadave të Shteteve të Bashkuara të Amerikës në Tiranë dhe Shkup

Për herë të parë në historinë e marrëdhënieve dypalëshe mes Shqipërisë dhe Maqedonisë, nëpërmjet kësaj nisme të ardhur nga shoqëria civile, u synua marrja e përgjegjësive për sigurinë ndërkufitare, nxitja e bashkëpunimit mes këtyre rajoneve kufitare. Zonat e përfshira në këtë projekt ishin Kukësi, Dibra, Librazhdi dhe Pogradeci për Shqipërinë dhe Dibra e Madhe, Struga dhe Ohri. Në kuadër të këtij projekti u organizuan disa takime të përbashkëta në të cilat u diskutuan dhe miratuan rekomandime të cilat u paraqitën institucioneve publike të të dy vendeve. Ky projekt rriti interesimin e aktorëve vendorë për të shtuar përpjekjet në dobi të përmirësimit të marrëdhënieve duke paraqitur institucioneve qendrore çështjet më të rëndësishme të cilat do të mund të paraqiten edhe gjatë takimeve të nivelit të lartë mes përfaqësuesve të të dy shteteve.

Koha dhe vendi: 12 Maj 2003, Salla e Shtëpisë së Librit dhe Komunikimit në Qendrën Ndërkombëtare të Kulturës, Tiranë  

Partner: Instituti Shqiptar i Medias

Pas vdekjes tragjike të kryeministrit serb Zoran Djindjic, një analist i mirënjohur nga Serbia, Dr. Dushan Janjic, koordinator i Forumit për Marrëdhëniet Etnike në Beograd, mbajti një kumtesë në Tiranë mbi zhvillimet më të fundit në Serbi dhe ndikimin e tyre në rajon. Auditori shqiptar, i përbërë nga gazetarë dhe analistë politikë, e pritën me interes analizën e Dr. Janjic dhe diskutuan mbi rëndësinë e bashkëpunimit dhe koordinimit rajonal në nivele të ndryshme me qëllim luftën ndaj krimit të organizuar dhe terrorizmit.

Kohëzgjatja: Maj 2002 – Shkurt 2003    

Partner: Instituti Euro-Ballkan (EBI), Shkup

Zona: Shqipëri, Maqedoni

Donator: Freedom House/USAID

Për herë të parë pas një periudhe mosbesimi mes Maqedonisë dhe Shqipërisë gjatë vitit 2001, personalitete publike, politikanë, deputetë, drejtues të mediave, opinionistë, përfaqësues të OJF, profesorë universitarë, biznesmenë, përfaqësues të organeve të pushtetit vendor të zonave ndërkufitare, përfaqësues të minoritetit maqedonas në  Shqipëri si dhe shqiptarë nga Maqedonia, u takuan në një forum me qëllim ushtrimin e ndikimit të tyre mbi publikun dhe politikë-bërësit e dy vendeve për të thelluar mirëkuptimin dhe bashkëpunimin dypalësh. Projekti u zhvillua në tre faza. Në fazën e parë u bë vlerësimin i gjendjes aktuale të marrëdhënieve mes dy vendeve, nëpërmjet një pyetësori që u shpërnda në 200 personalitete të ndryshme në Shqipëri dhe Maqedoni. Në fazën e dytë u organizuan 2 tryeza të rrumbullakëta nga organizatat partnere IDN dhe EBI, një në Tiranë dhe një në Shkup. Faza finale u përmbyll me Konferencën Rajonale të organizuar në Ohër në datën 7 Korrik 2002. Projekti krijoi një dialog civil shumë faktorial mes personaliteteve të të dy vendeve, që u përqendrua në përpjekjet e përbashkëta për tejkalimin e problemeve të ndryshme për një rajon të qetë dhe integrues. Mediat në të dy vendet pasqyruan rëndësinë e këtij projekti: “OJF-të arrijnë sukses aty ku politika dështon” – Gazeta Aktuel Shkup; “Instituti Euro-Balkan dhe Instituti për Demokraci dhe Ndërmjetësim i paraprijnë takimit të kryeministrave Nano dhe Cervenkovski” – Korrieri Tiranë.