Qendra për Studime të Sigurisë (QSS) përfaqëson një departament të specializuar të IDN, aktiviteti i të cilit drejtohet nga studiues me eksperiencë në një përpjekje për të promovuar ekselencë në procesin dhe rezultatet e kërkimit, studimit, politikë-bërjes dhe reformave në fushën e sigurisë. Nëpërmjet kësaj Qendre IDN synon të krijojë një kuadër të qëndrueshëm resursesh për t’i ofruar asistencë dhe ekspertizë procesit të krijimit dhe zbatimit të politikave të sigurisë, si edhe zhvillimit të mëtejshëm të kapaciteteve të institucioneve në sektorin e sigurisë në përputhje me tendencat bashkëkohore të studimeve në këtë fushë. Krijimi i QSS vjen pas një përfshirje të vazhdueshme dhe eksperience gati tetë vjeçare (2000 – 2008) të Institutit për Demokraci dhe Ndërmjetësim në avancimin e politikave, institucioneve dhe qeverisjes së sektorit të sigurisë nëpërmjet projekteve dhe programeve specifike të fokusuara tek sfidat bashkëkohore ndaj sigurisë kombëtare dhe rajonale, bazuar në një perceptim të gjerë të sigurisë i cili përfshin dimensionin politik, ekonomik, socio-kulturor dhe dimensione të tjera.

Qendra për Studime të Sigurisë mbështet një qasje të kombinuar analitike (problem-solving) dhe trajnuese për të nxitur një debat të informuar mbi zhvillimet në sektorin e sigurisë, duke njohur dhe duke u mbështetur në një perspektivë multi-dimensionale të sigurisë rajonale, në respekt të plotë të rëndësisë së përmbushjes së qëllimeve strategjike të integrimit në strukturat e BE dhe NATO. Përpjekje të vazhdueshme për kërkime novatore për çështje dhe zhvillime në fushën e sigurisë do të përbëjnë një element shtesë për promovimin, avokimin dhe përhapjen e ekspertizës në fushën e studimeve të sigurisë në nivel rajonal.