I nderuar vizitor! 

Ndjehem i nderuar nga vizita juaj në faqen tonë.

Me anë të kësaj përshëndetjeje dëshiroj t’ju falënderoj për interesimin në organizatën tonë dhe në të njëjtën kohë t’ju prezantoj me Institutin për Demokraci dhe Ndërmjetësim (IDN).

I themeluar në vitin 1999, IDN është një organizatë joqeveritare e pavarur që punon për fuqizimin e sektorit të shoqërisë civile në Shqipëri, për zhvillimin e partneriteteve të gjera me bazë komunitare të përqendruara në rritjen e njohjes dhe kapaciteteve të komuniteteve për të marrë pjesë në proceset demokratike për përmirësimin e qeverisjes në të gjitha nivelet, ndërtimin e një mjedisi të shëndoshë të komunitetit dhe për të punuar së bashku për të mirën e përgjithshme.

Për të arritur objektivat e veta strategjike, zgjedhja e aktiviteteve nga ana e IDN është një përpjekje për të shkuar përtej projekteve të veçuara. Aktivitetet e IDN përbëjnë një angazhim në vazhdimësi për të fuqizuar vlerat dhe mirëkuptimin e përbashkët ndërmjet spektrit të gjerë të aktorëve politikë dhe jopolitikë në Shqipëri, në kohën që vendi shkon përpara drejt forcimit të institucioneve, zbatimit të ligjit dhe shtetit ligjor.  IDN beson se me anë të partneriteteve me organizata dhe institucione ndërkombëtare është e rëndësishme të zhvillohet  zotërimi vendor i reformave që do të çojnë drejt integrimit të plotë të Shqipërisë në bashkësinë evro-atlantike të vendeve demokratike. 

Ne që punojmë në IDN besojmë se të gjithë ata që ndikohen nga vendim-marrja duhet të jenë pjesë e procesit të vendim-marrjes. Prandaj, IDN kërkon të promovojë pjesëmarrje më të madhe nga komuniteti dhe jep ndihmesën në zhvillimin e kuadrove ligjorë që do të lejojnë këtë pjesëmarrje në proceset vendim-marrëse në të gjitha nivelet.

IDN ka miq dhe bashkëpunëtorë të shumtë në Shqipëri dhe jashtë saj që kanë dhënë ndihmesën në zhvillimin dhe fuqizimin e organizatës. Përfitojmë nga rasti për t’i falënderuar të gjithë ata dhe për t’u dhënë mundësinë që të ndjehen krenarë për punën që kanë bërë për mbështetjen e kësaj organizate.

Me këtë filozofi që na udhëzon në punën tonë, ne ju ftojmë që të vizitoni faqen tonë dhe të shikoni kontributin që kemi dhënë me anë të programeve dhe projekteve të zbatuara në pjesë të ndryshme të vendit.

Përsëri ju urojmë mirëseardhjen dhe ju urojmë që t’ia kaloni sa më mirë gjatë leximit dhe kërkimeve tuaja në faqen tonë.

Me respekt,

Sotiraq Hroni